Nu denn, de Sümmer is vorbie. Heller heite doage heb wie hat. Hebt schwäitet äs‘n Stück Ies in de Sauna.
Rekordhätte, seggen däi Meteorologen, vääl tau dröge mäint däi Buurn. Den Rasen wordt bruun, däi Strüke und Blaumen in‘n goarn verdröget. Man Pläseier geef het uk. Lichtet tüch antrekken, und an däi Fäute: nicks. Boarft lopen is nich nur mooi, dat is uk gesund. Am läivsten över lossen Sand off an den Strand. Däi Fäute bünt nich inquetscht, dat Blaut kann mooi zirkulieren. Den Noadäil: man mott moal meer däi Fäute wasken.
Nu is het aber doane mit boarft lopen. Villichte noch inhuus, man buten nich meer. Un bold koamt däi ganz dicken Socken an. Wenn‘t buten kolt wörd un wie nich so nietske heizen düürt. Wegen den Putin, wegen dat Portemonnee, wegen däi Umwelt.
So mooi as dat in‘n Sömmer was, wenn man nicks an de Fäute heff, in‘n Winter fräisen, is kiene gaude Lösung. Ik glöv, dicke Wullsocken krieget Hochkonjunktur. Villichte kann man däi sogar up de Püntedoage kopen.